*मंगेश चिवटे यांच्या उमेदवारीसाठी मुख्यमंत्री आणि उपमुख्यमंत्र्यांकडे मागणी करणार — आरोग्यमंत्री प्रकाश आबिटकर यांचे प्रतिपादन*
कोल्हापूर | प्रतिनिधी :
पुणे विभाग शिक्षक मतदारसंघातून आरोग्यदूत मंगेश चिवटे यांना महायुतीकडून उमेदवारी मिळावी, यासाठी मुख्यमंत्री देवेंद्र फडणवीस तसेच उपमुख्यमंत्री एकनाथ शिंदे आणि सुनेत्रा पवार यांच्याकडे ठामपणे मागणी करणार असल्याचे सार्वजनिक आरोग्यमंत्री प्रकाश आबिटकर यांनी स्पष्ट केले.
मंगेश चिवटे यांनी गेल्या अनेक वर्षांपासून रुग्णसेवा आणि सामाजिक कार्याच्या माध्यमातून महाराष्ट्रातील सर्वसामान्य नागरिकांशी जिव्हाळ्याचे नाते निर्माण केले आहे. गरजू रुग्णांना उपचारासाठी मदत मिळवून देताना त्यांनी केलेला सातत्यपूर्ण पाठपुरावा, संकटाच्या काळात नागरिकांच्या मदतीला धावून जाण्याची भूमिका आणि व्यापक जनसंपर्क ही त्यांच्या कार्याची खरी ओळख असल्याचे यावेळी नमूद करण्यात आले.
“रुग्णसेवेतून समाजसेवेचा आदर्श निर्माण करणाऱ्या मंगेश चिवटे यांना आता शिक्षकांच्या प्रश्नांसाठी व्यापक लोकप्रतिनिधित्वाची संधी मिळाली पाहिजे. त्यांच्या उमेदवारीसाठी मुख्यमंत्री आणि उपमुख्यमंत्र्यांकडे आम्ही निश्चितपणे मागणी करणार आहोत,” असे प्रकाश आबिटकर यांनी सांगितले.
शिक्षकांच्या प्रश्नांना मिळणार सक्षम आवाज
पुणे, सातारा, सांगली, सोलापूर आणि कोल्हापूर या पाच जिल्ह्यांचा समावेश असलेल्या पुणे विभाग शिक्षक मतदारसंघातील शिक्षकांचे अनेक प्रश्न प्रलंबित आहेत. वेतन व सेवाशर्ती, अनुदान, शैक्षणिक संस्थांशी संबंधित अडचणी, शिक्षकांच्या विविध प्रशासकीय मागण्या आणि शैक्षणिक क्षेत्रातील प्रश्न यासाठी विधानपरिषदेत सातत्याने आवाज उठविणारा लोकप्रतिनिधी आवश्यक आहे.
मंगेश चिवटे यांच्या सामाजिक आणि रुग्णसेवेतील अनुभवाचा शिक्षकांच्या प्रश्नांसाठी उपयोग व्हावा, यासाठी त्यांना संधी मिळणे गरजेचे असल्याची भूमिका यावेळी मांडण्यात आली.
“मंगेश चिवटे यांनी आतापर्यंत हजारो गरजू कुटुंबांच्या अडचणी सोडविण्यासाठी काम केले आहे. त्यांच्या सेवाभावी वृत्तीला शिक्षकांच्या प्रश्नांची जोड मिळाल्यास या मतदारसंघातील शिक्षकांचा आवाज अधिक प्रभावीपणे शासनदरबारी पोहोचेल,” असेही आबिटकर यांनी स्पष्ट केले.
महायुतीच्या नेतृत्वाकडे ठाम पाठपुरावा
पुणे शिक्षक मतदारसंघाची जागा शिवसेनेला मिळावी आणि मंगेश चिवटे यांना महायुतीकडून उमेदवारी मिळावी, यासाठी महायुतीच्या वरिष्ठ नेतृत्वाशी चर्चा करून भूमिका मांडण्यात येणार असल्याचे प्रकाश आबिटकर यांनी सांगितले.
“मंगेश चिवटे यांच्या उमेदवारीसाठी आम्ही एकजुटीने पाठपुरावा करू. शिक्षक समाजाच्या प्रश्नांना न्याय देण्यासाठी आणि त्यांचा आवाज विधानपरिषदेत बुलंद करण्यासाठी मंगेश चिवटे यांना संधी मिळणे महत्त्वाचे आहे,” असे आबिटकर यांनी प्रतिपादन केले.
आरोग्यसेवेपासून सामाजिक कार्यापर्यंत आणि आता शिक्षकांच्या प्रश्नांसाठी लोकप्रतिनिधित्वाच्या दिशेने मंगेश चिवटे यांचा प्रवास सुरू झाला असून, त्यांच्या उमेदवारीसाठी महायुतीतील वरिष्ठ नेत्यांकडे होत असलेला पाठपुरावा आगामी राजकीय समीकरणांच्या दृष्टीने महत्त्वपूर्ण मानला जात आहे.