- अखेर क्षीरसागर आलेच नाहीत, राजू शेट्टींची दोन तास बिंदू चौकात प्रतीक्षा
कोल्हापूर प्रतिनिधी
शक्तीपीठ महामार्गाचे समर्थन करता करता वाहवत गेलेले राजेश क्षीरसागर यांनी राजू शेट्टी यांची ५०० एकर जमीन असल्याचा करण्यात आलेल्या कथीत आरोपाला उत्तर देत सदरची जमीन राजेश क्षीरसागर यांच्या नावावर करण्यासाठी राजू शेट्टी कार्यकर्त्यासमवेत भर पावसात जवळपास २ तास बिंदू चौकात ठाण मांडून बसले. राजेश क्षीरसागर न आल्याने कार्यकर्त्यांच्या साक्षीने त्या बक्षिसपत्रावर सह्या करून सदरचे बक्षिसपत्र रात्री- अपरात्री कधीही येवून घेवून जाण्याचे आवाहन राजू शेट्टी यांनी आमदार राजेश क्षीरसागर यांना केले.
कोल्हापूर शहरचे आमदार राजेश क्षीरसागर यांनी राजू शेट्टी यांच्याकडे ५०० एकर जमीन असल्याचा आरोप प्रसार माध्यमातून केला होता. आमदार राजेश क्षीरसागर यांनी लोकसभेतील विवरण पत्राव्यतिरिक्त ५०० एकर जमीनीचे सात बारे त्यांनी दाखवावे ती सर्व जमीन राजेश क्षीरसागर यांचे नावे बक्षिसपत्र करणार असल्याचे केलेल्या आव्हानानुसार वकीलासह उपस्थित राहून बक्षिसपत्राचे कार्यकर्त्यांच्या साक्षीने वाचन करून त्यावर सह्या केल्या.
यावेळी बोलताना राजू शेट्टी म्हणाले कि मी आजपर्यंत पाच निवडणुका लढविल्या त्या सर्व निवडणुका जनतेच्या लोकवर्गणीतून लढविल्या. मला राज्यभर फिरण्यासाठी दिलेली फॅार्च्युनर गाडीसुध्दा लोकवर्गणीतून देण्यात आलेली आहे. मला कधी गाडी घेण्यासाठी आय. आर. बी च्या कंपनीसमोर ठिय्या आंदोलन करावे लागले नाही , मी कोणत्या मल्टीस्पेशालिटी दवाखान्याच्या डॅाक्टराकंडून , शहरातील बिल्डराकडून , जिल्ह्यातील शासकीय कार्यालयातील खातेप्रमुखाकडून ,औद्योगीक वसाहतीतील उद्योजकाकडून बगलबच्चांना पाठवून हप्ते गोळा केले नाहीत. महापालिकेतील मोक्याच्या जागेवर आरक्षण टाकून जमीनी बळकावल्या नाहीत यामुळे राजेश क्षीरसागर यांनी माझ्या संपत्तीची कधीही चौकशी करावी असा टोला शेट्टी यांनी लगाविला.
आज दुपारी १२ वाजता बिंदू चौकात हजर राहणार असल्याचे शेट्टी यांनी सांगितल्यानुसार सकाळी ११. ४५ वाजताच बिंदू चौकात उपस्थित राहिले. दुपारी १२.३० वाजेपर्यंत जिल्ह्यातील कानाकोप-यातून हजारो पदाधिकारी व कार्यकर्ते उपस्थित राहिले होते. शक्तीपीठ महामार्ग विरोधी व राजेश क्षीरसागर यांच्याविरोधात घोषणा देवून बिंदू चौक दणानून सोडला.स्वाभिमानीचे आंदोलन असल्याने पोलिस प्रशासनाकडून मोठा पोलिस बंदोबस्त तैनात करण्यात आला होता.
यावेळी शिवसेना जिल्हाध्यक्ष विजय देवणे , स्वाभिनानीचे जिल्हाध्यक्ष अजित पोवार , जिल्हाध्यक्ष रविकिरण इंगवले , कॅाम्रेड सम्राट मोरे , सुनिल मोदी , काँग्रेसचे शहराध्यक्ष सचिन चव्हाण , धनाजी पाटील , राजाराम देसाई , सचिन शिंदे , जयकुमार कोले , पोपट मोरे , संदीप राजोबा यांच्यासह स्वाभिमानी शेतकरी संघटना व शक्तीपीठ विरोधी कृती समितीचे पदाधिकारी कार्यकर्ते मोठ्या संख्येने उपस्थित होते.
