रणरागिणी ताराराणी
नाटकाचा आज कोल्हापुरात प्रयोग
सध्या अनेक ऐतिहासिक सिने कलाकृती प्रेक्षकांना भुरळ पाडताहेत. भव्य सेट्स ग्राफिक्स यामुळे सिनेमाचा दर्जा खुलतो. मात्र अनेक वर्षात नवीन ऐतिहासिक नाट्यकृती रंगमंचावर आल्याच नाहीत. ही उणीव भरून काढलीय शिवाजी नाट्य मंदिर दादर या संस्थेने स्वतःची पहिलीच निर्मिती रणरागिणी ताराराणी नाटकाच्या रूपाने रंगमंचावर आणली आहे. या नाटकाचा प्रयोग उद्या (मंगळवारी) येथील देवल क्लबच्या गोविंदराव टेंबे रंगमंदिरात सायंकाळी सात वाजता होणार आहे.
इतिहास म्हटलं की शिवराय हे समीकरण आपल्यासाठी घट्ट आहे.. मात्र शिवरायांना त्या तोलामोलानं घडवणाऱ्या जिजाऊ, शंभूराजांच्या पाठीशी सावलीसारख्या उभ्या श्री सखी राज्ञी येसुबाई साहेब आणि स्वराज्याच्या हास पर्वामध्ये औरंगजेबा सारख्या अखिल हिंदुस्थानच्या पातशहाला आपल्या तलवारीच्या सामर्थ्यावर गुडघे टेकायला लावणाऱ्या ताराराणी साहेब यांचा इतिहास आपल्याला नजरे आड करता येत नाही. महाराष्ट्र भूमीत सत्तावीस वर्षे औरंगजेबाला सळो की पळो करून सोडणाऱ्या स्वराज्याच्या त्या निर्णायक लढाईचा इतिहास रणरागिणी ताराराणी नाटकाच्या माध्यमातून उलगडला आहे.. नुकताच या नाटकाचा रौप्य महोत्सवी प्रयोग शिवाजी नाट्य मंदिर दादर इथे संपन्न झाला.
कोल्हापूर ही रणरागिणी ताराराणी यांची राजगादी. त्या धामधुमीच्या काळात ताराराणीनी आपली राजधानी कोल्हापूर इथे स्थापन केली आणि इथे ही इतिहासाचे नवे पर्व उभे कैले. कोल्हापूर वासीयांसाठी हे नाटक म्हणूनच एक वेगळी पर्वणी ठरणार आहे.
नाटकाची संकल्पना चंद्रकांत (अण्णा) सावंत यांची असून निर्मितीची धुरा सांभाळली आहे ब्रिगेडियर सुधीर सावंत यांनी. दिग्दर्शन विजय राणे यांचं तर नाटकाचं लेखन केलं आहे कोल्हापूरचे प्रथितयश लेखक युवराज पाटील यांनी. तनिषा वर्दे, सुनील गोडसे, मुकुल देशमुख, प्रसाद धोपट, उमेश ठाकूर, ऋषिकेश शिंदे, चेतन म्हसके, मोहिका गद्रे, सिद्धी घैसास, अरुण पंदरकर, तेजस भोर, कृष्णा राजशेखर, संदीप सिंगडाने, नीलेश नाईक, प्रथमेश येवले, विक्रांत खातू, संकेत वाणी यांच्या नाटकात भूमिका आहेत.
नाटकाच्या निमित्ताने रणरागिणी ताराराणी महाराष्ट्रभर नवा इतिहास घडवतील असा विश्वास निर्माते ब्रिगेडियर सुधीर सावंत यांनी व्यक्त केला. ही कलाकृती जास्तीत जास्त लोकांपर्यंत पोहचावी आणि इतिहासाची जाणीव ज्वलंत रहावी हेच या कलाकृतीचे यश असेल असं दिग्दर्शक विजय राणे यांनी सांगितलं.. ऐतिहासिक भाषेचा लहेजा सांभाळत उर्दू भाषेचा सुद्धा प्रसंगानुरूप वापर करत ही नाट्यकृती लिहिली गेली आहे.. अनेक ऐतिहासिक सिनेमे मालिका आणि नाटक लिहिणारे लेखक युवराज पाटील यांनी दस्ताऐवजी कृत इतिहासाचा अभ्यास करून ही नाट्यकृती उतरवली आहे. रोमांच आणणारे संवाद आणि प्रसंग यामुळे ती नक्कीच प्रेक्षकांना भावेल असं मत लेखक युवराज पाटील यांनी व्यक्त केले.
सई पाटील सहलेखिका
नाटकाची सहलेखिका म्हणून युवराज पाटील यांची मुलगी सई पाटील हिचेही योगदान आहे. नाटकातील काही प्रवेश तिच्या लेखणीतून उतरले आहेत. पुढच्या दोन महिन्यात तिने स्वतंत्रपणे लिहिलेली एक ऐतिहासिक कादंबरी प्रकाशित होणार आहे. सई सध्या सिंधुदुर्ग जिल्ह्यातील एसएसपीएम कॉलेज इथे एमबीबीएसच्या दुसऱ्या वर्षात शिक्षण घेते आहे.