*डी. वाय. पाटील टेक्निकल कॅम्पसचा ‘नगरसेतू’*
*आंतरराष्ट्रीय ‘सेग्यू ३.०’ स्पर्धेत ठरला अव्वल*
३ हजार संघांना मागे टाकत ‘द डिस्रप्टर्स’ संघाने पटकावला प्रथम क्रमांक
५० हजार रुपयांचे पारितोषिक
तळसंदे
ग्रेटर नोएडा येथील एनआयईटी येथे आयोजित आंतरराष्ट्रीय स्तरावरील ‘सेग्यू ३.० – जागतिक रचना-विचार आव्हान’ (Global Design-Thinking Challenge) या स्पर्धेत तळसंदे येथील डी. वाय. पाटील टेक्निकल कॅम्पसच्या विद्यार्थ्यांनी बाजी मारली. संगणक विज्ञान व अभियांत्रिकी विभागातील तेजस चौगुले व प्रतीक तुपे यांच्या ‘द डिस्रप्टर्स’ या संघाने विकसित केलेल्या ‘नगरसेतू’ या प्रकल्पाने प्रथम क्रमांक पटकावला. या दैदिप्यमान यशाबद्दल संघाला ५० हजार रुपयांचे रोख पारितोषिक देऊन गौरविण्यात आले.
या आंतरराष्ट्रीय स्पर्धेत देश-विदेशातील ३ हजाराहून अधिक संघांचा सहभाग होता. अंतिम फेरीत तेजस चौगुले व प्रतीक तुपे यांनी स्वतः विकसित केलेल्या ‘नगरसेतू’ या कृत्रिम बुद्धिमत्तेवर (AI) आधारित, भ्रमणध्वनी-केंद्रित नागरी समस्या व्यवस्थापन प्रणालीचे प्रभावी प्रात्यक्षिक सादर केले.
**काय आहे ‘नगरसेतू’?*
‘नगरसेतू’ हे नागरिक, नगरपालिका प्रशासन आणि क्षेत्रीय कर्मचारी (Field Workers) यांना एकाच डिजिटल व्यासपीठावर आणणारे अत्याधुनिक ॲप आहे. या प्रणालीद्वारे नागरिकांना रस्त्यांवरील खड्डे, कचरा, पाणीपुरवठा किंवा पथदिवे यांसारख्या नागरी समस्या थेट मोबाईलद्वारे फोटोसह नोंदवता येतात. कृत्रिम बुद्धिमत्तेच्या मदतीने ही तक्रार तत्काळ संबंधित विभागाकडे वर्ग होते आणि क्षेत्रीय कर्मचाऱ्यांमार्फत त्यावर जलद व पारदर्शक पद्धतीने कार्यवाही केली जाते.
विद्यार्थ्यांची नाविन्यपूर्ण संकल्पना, प्रभावी सादरीकरण आणि नागरी समस्या सोडवण्यातील तंत्रज्ञानाचा अचूक वापर यांमुळे परीक्षकांनी ‘नगरसेतू’ प्रकल्पाला प्रथम क्रमांकाची पसंती दिली.
या यशाबद्दल संस्थेचे अध्यक्ष डॉ. संजय डी. पाटील, उपाध्यक्ष आमदार सतेज डी. पाटील, विश्वस्त आमदार ऋतुराज एस. पाटील, पृथ्वीराज एस. पाटील, कार्यकारी संचालक डॉ. ए. के. गुप्ता, टेक्निकल कॅम्पसचे संचालक डॉ. एस. आर. पावसकर, शैक्षणिक अधिष्ठाता प्रा. आर. एस. पोवार, असिस्टंट रजिस्ट्रार जे. ए. पोवार, संगणक विज्ञान विभागप्रमुख सौ. पी. पी. बावणे, आयक्यूएसी प्रमुख प्रा. के. के. सहस्रबुद्धे यांनी तेजस व प्रतीक यांचे अभिनंदन करून भावी वाटचालीस शुभेच्छा दिल्या.
*तळसंदे*- ‘सेग्यू ३.०’ आंतरराष्ट्रीय स्पर्धेत प्रथम क्रमांक मिळवल्याबद्दल तेजस चौगुले व प्रतीक तुपे यांचे अभिनंदन करताना डॉ. एस. आर. पावसकर. समवेत प्रा. आर. एस. पोवार, प्रा. के. के. सहस्रबुद्धे व सौ. पी. पी. बावणे.