*गरुड मंडपाच्या सिलिंग पर्यंतची कामे नवरात्री पूर्वी पूर्ण करा*
*-जिल्हाधिकारी डॉ विजय राठोड*

­

कोल्हापूर, दि.19 (जिमाका): श्री अंबाबाई मंदिर परिसरात सुरु असणारी सर्व कामे दर्जेदार करा. गरुड मंडपाचे काम शक्य तितक्या गतीने करा. गरुड मंडपाच्या सिलिंग पर्यंतची कामे नवरात्री पूर्वी पूर्ण करा, अशा सूचना जिल्हाधिकारी डॉ.विजय राठोड यांनी दिल्या.

श्रीअंबाबाई मंदिर परिसरातील गरुड मंडपाच्या नूतनीकरण कामाची आढावा बैठक जिल्हाधिकारी डॉ. राठोड यांच्या अध्यक्षतेखाली जिल्हाधिकारी कार्यालयातील शाहूजी सभागृहात पार पडली. यावेळी पश्चिम महाराष्ट्र देवस्थान व्यवस्थापन समितीच्या सचिव वर्षा साळुंखे, पुरातत्त्व विभागाचे सहायक संचालक विलास वहाने, व्यवस्थापक महादेव दिंडे, उपअभियंता सुयश पाटील, कॉन्ट्रॅक्टर चंदुलाल ओसवाल, कन्सल्टंट योगेश कासार -पाटील आदी उपस्थित होते.

अंबाबाई मंदिराला भेट देऊन गरुड मंडपाच्या नूतनीकरण कामाच्या सद्यस्थितीबाबत वेळोवेळी पाहणी केली जाईल. तसेच येत्या आठवड्याभरात पुन्हा बैठक घेऊन झालेल्या कामाच्या प्रगतीचा आढावा घेण्यात येईल, असे जिल्हाधिकारी डॉ.राठोड यांनी स्पष्ट केले.

वर्षा साळुंखे व सुयश पाटील यांनी कामाच्या सद्यस्थितीचे सादरीकरण केले.
*******